kisi surat se ho jata hai saman-e-safar paida
irada kar hi leta hai khud apni rahguzar paida

gunahgari ki niyyat ko gunahgari nahin kahte
safar ke qasd se hoti hai kab gard-e-safar paida

zaruri kya ki barse aag upar se nasheman par
khas-o-khashak hain ho jaenge barq-o-sharar paida

koi pursan-e-gham ho ya na ho kya farq padta hai
aziyyat khud hi kar leti hai apna chaaragar paida

'munawar' mujh pe sham-e-yas ghaalib aa nahin sakti
ki har ummid se hota hai ek rang-e-sahar paida