kisi taraf na girah ka sira dikhai de
na koi nakhun-e-uqda-kusha dikhai de

yahi tilism to aiwan-e-eqtidar mein hai
ki khud ko banda-e-ajiz khuda dikhai de

tamam-shahr ne chehre badal liye shayad
taras gae hain koi aashna dikhai de

masham-e-jaan teri khushbu se is qadar manus
mahak badan ki ba-dosh-e-saba dikhai de

zamin ka chand mera kaenat mein yakta
agar hai us sa koi dusra dikhai de