kisi train ke niche wo kat gaya hota
ghubar-e-rah-e-tilismat chhat gaya hota

chalo ye achchha ki chandan badan se dur rahe
main sanp ban ke kamar se lipat gaya hota

kisi ke hijr mein itni ghutan se behtar tha
hawa mein surat-e-ghubara phat gaya hota

hua ki dher si ashiya se bhar gaya daman
ai kash zarra-e-neki bhi at gaya hota

zaban aati to uslub koi gadh leta
use patana nahin tha wo pat gaya hota