kitna jaan-soz hai manzar meri tanhai ka
hausla mujh mein nahin anjuman-arai ka

main ne samjha tha jise bais-e-taskin-e-nazar
us ne saman kiya hai meri ruswai ka

meri baaton mein naya rang kahan se aae
mere dil mein bhi hai ek zakhm shanasai ka

baat to jab hai ki jazbon se sadaqat phute
yun to dawa hai har ek shakhs ko sachchai ka

ruh mein jazba-e-ulfat ko fuzun pata hun
jab khayal aata hai mujh ko teri ranai ka

ai 'khayal' aatish-e-ehsas bhadak jaegi
aap dawa na karen dhup mein danai ka