kitni dilkash hayat hoti hai
jab kahin dil ki baat hoti hai

gham ki tarikiyon mein raushan-tar
un ke wade ki raat hoti hai

kis ne apna maal dekha hai
zindagi be-sabaat hoti hai

jo ana ke asir hote hain
un ka mehwar to zat hoti hai

wusat-e-qalb ki bisat na puchh
is mein ek kaenat hoti hai

lamha lamha sukun nahin hota
jab adawat ki baat hoti hai

hai yaqin ba'd zindagi ke kahin
gham se 'sadiq' najat hoti hai