kitnon ko dastiyab hai kitnon ka rizq hai
ek chand hai jo hijr ki raaton ka rizq hai

faqon se mar na jaen unhen ab dikhai de
ye jaan le ki tu meri aankhon ka rizq hai

us nabz ki baqa ko zaruri hai tera lams
khushbu tere wajud ki sanson ka rizq hai

dekhega ye hujum mujhe kis nigah se
ye khauf apne aap mein naslon ka rizq hai

wo makhmali se khwab to ab khwab ho gae
le de ke iztirab hi ghazlon ka rizq hai