koi bahaar ki khatir koi khizan ke liye
bas ek main hi raha sirf gulsitan ke liye

ilahi mujh se nazar chhin le ki ahl-e-nazar
tamam-umr tadapte hain raaz-dan ke liye

masarraten jo milin tere lutf-e-paiham se
machal rahi hain kisi jaur-e-na-gahan ke liye

mujhe hain khar se kuchh khas nisbaten ki ye gul
bahaar mein na khila raunaq-e-khizan ke liye

hamein un ahl-e-sukhan mein na kar shumar ki ye
fughan bhi karte hain khush-waqti-e-fughan ke liye

karen na zikr tumhaara to kya karen ki hamein
kuchh aur mil na saka apni dastan ke liye

hamare des mein iran-o-najd se ustad
bulae jate hain talim-e-ashiqan ke liye

hamare shahr mein fan ke ijara-daron ne
kuchal rakha hai dilon ko faqat zaban ke liye

hum apne des aur apne hi shahr mein 'ali'
gada-gadi pe hain majbur soz-e-jaan ke liye