koi charagh ata kar koi gulab utar
wagarna shahr-e-sitam par wahi azab utar

zamin-e-shahr ko is darja munjamid kar de
har ek chikh uthe sar pe aaftab utar

hamein barahna kiya tu ne har zamane mein
zamin pe tu bhi kabhi khud ko be-hijab utar

har ek hath mein ya kasa-e-gadai de
wagarna sab ke liye rizq be-hisab utar

main tere nur ka munkir nahin falak wale
magar zamin pe kabhi apna mahtab utar