koi deta hai kisi ko bhi to kya deta hai
dast-e-ehsan ko mizan pe la deta hai

koi to sang-e-lab-e-rah sa munis thahre
rah ka mod jo chupke se bata deta hai

shahr-e-gum-gashta ka wo katba jo hai gard-alud
har musafir use jine ki dua deta hai

ye mera ahd hai tawil-e-sukunat de kar
ghar ke darwaze ko diwar bana deta hai

'qaus' be-sud nahin jata hai pani ka lahu
ye tapakta hai to rangin faza deta hai