koi diwar salamat hai na ab chhat meri
khana-e-khasta ki surat hui haalat meri

mere sajdon se munawwar hai teri rahguzar
meri peshani pe raushan hai sadaqat meri

aur kuchh der yunhi mujh ko tadapne dete
aap ne chhin li kyun hijr ki lazzat meri

ye alag baat ki main fateh-e-azam thahra
warna hoti rahi har gam hazimat meri

main ne har lamha nai jast lagai 'aslam'
mujh se wabasta rahi phir bhi riwayat meri