koi hai baam par dekha to jae
ujale ka safar dekha to jae

charagh-e-chashm-e-tar dekha to jae
mohabbat ka asar dekha to jae

jo baal-o-par pe nazan ho rahe hain
unhen be-baal-o-par dekha to jae

ye naqsha mustarad to ho chuka hai
magar bar-e-digar dekha to jae

ghamon ki dhup mein lab par tabassum
ye jine ka hunar dekha to jae

hawa-e-tund barg-e-be-shajar ko
udati hai kidhar dekha to jae

hamari hausla-mandi ko 'tariq'
miyan-e-khair-o-shar dekha to jae