koi itna be-sahaara kaise ho sakta hai yar
ek manzar par guzara kaise ho sakta hai yar

khak pani aur saba ka bhi to kuchh hissa rahe
phul aakhir bas tumhaara kaise ho sakta hai yar

ishq mein ho wasl ya ke hijr donon hain baja
dil ka sauda hai khasara kaise ho sakta hai yar

maut se pahle karun tauba main yaad-e-yar se
mujh se majnun ko gawara kaise ho sakta hai yar

tujh ko chahe jo main us par war dun duniya jahan
is se badh kar koi pyara kaise ho sakta hai yar