koi kami zarur thi tera karam na mil saka
chhod diya sanam-kada phir bhi haram na mil saka

hum ko bhi thi ye aarzu chalte kisi ke sath sath
log to kitne hi mile jazb-e-baham na mil saka

ye bhi hai apni hi khata dil mein koi nahin bacha
shama koi na jal saki koi sanam na mil saka

waqt ke mir-o-shahryar darpa-e-jaan hain is liye
apne huzur kyon unhen sar mera kham na mil saka

dar pe khinch kar mujhe us ko kahan sukun magar
is se bada koi use aur sitam na mil saka

'azhar'-e-khasta-jaan kisi dasht ki ab tu rah le
chaaragaron ke shahr mein chaara-e-gham na mil saka