koi khwahish koi arman koi hasrat na rahe
itna roen ki hamein koi shikayat na rahe

ghair-mumkin hai magar sai to kar ke dekhen
shoala-e-zabt ki phir dil mein hararat na rahe

dur itne na raho tum ki bahut mumkin hai
mujh ko ek roz tumhaari bhi zarurat na rahe

hum se hai dozakh-o-jannat ka tamasha ya-rab
hum na hon gar to koi un ki haqiqat na rahe

un ko insan 'jahangir' kahun main kaise
chahte hain jo zamane mein mohabbat na rahe