koi lakh tum se khafa rahe na kisi ko khud se juda karo
yahi zindagi ka usul hai gale sab se badh ke mila karo

kabhi raaz-e-dil na ayan karo na to ghair hi ki suna karo
tumhein jo bhi kahna hai shauq se mere pas aa ke kaha karo

mere pith pichhe raqib se karo yun na raaz ki baat tum
jo gila hai mujh se agar koi meri baat mujh se kaha karo

badi jaan-faza hai ye dosti zara dushmani ka bhi lutf lo
kabhi dushmanon se gale milo kabhi un ke haq mein dua karo

bhala baat koi ye baat hai ki ho dil mein kuchh to zaban pe kuchh
jo kaha karo wo kiya karo jo kiya karo wo kaha karo

hai 'zafar' ye dasht-e-junun magar har ek lamha kanton ka kya gila
kabhi nok-e-sozan-e-khar se phate pairahan bhi siya karo