koi nishani-e-ahd-e-visal de jae
wo meri umr mere mah-o-sal de jae

use kaho ki kisi roz aa ke phir mujh ko
hasin khwab achhute khayal de jae

palat ke aae kabhi us ki yaad ka mausam
gul-e-murad ko rang-e-jamal de jae

khuda kare ki achanak wo samne aa kar
mere labon ko nae kuchh sawal de jae

tamam umr ki khushiyan samet kar meri
tamam umr ke apne malal de jae

koi to ho jo mere chaara-gar se ja ke kahe
dawa kabhi to mere hasb-e-haal de jae

agar nahin hai mudawa zawal ka 'shahid'
wo hausla to ba-waqt-e-zawal de jae