koi rafiq baham hi na ho to kya kije
kabhi kabhi tera gham hi na ho to kya kije

hamari rah juda hai ki aisi rahon par
riwaj-e-naqsh-e-qadam hi na ho to kya kije

hamein bhi baada-gusari se aar thi lekin
sharab zarf se kam hi na ho to kya kije

tabah hone ka arman sahi mohabbat mein
kisi ko khu-e-sitam hi na ho to kya kije

hamare sher mein roti ka zikr bhi hoga
kisi kisi ke shikam hi na ho to kya kije