koi to baat hogi tumhaari nigah mein
dil jo na rah saka tha hamari panah mein

tum se to yun hua nahin sarzad koi qusur
hogi koi kami hi hamari nibah mein

hum kyun karen tumhaari wafa se koi gila
jab khud hi kho gae the zamane ki chah mein

tum ne diya tha sath magar hum na chal sake
hum ko najat kab mili kanton se rah mein

dariya se pyas bujh na sakegi ye soch kar
lahra ke chal pade the samundar ki chah mein