koi wahshi chiz si zanjir-e-pa jaise hawa
dur tak lekin safar ka silsila jaise hawa

band kamre mein paraganda khayalon ki ghutan
aur darwaze pe ek aawaz-e-pa jaise hawa

girti diwaron ke niche sae jaise aadmi
tang galiyon mein faqat aks-e-hawa jaise hawa

aasman-ta-asman sunsan sannate ki jhil
daera-dar-daera meri nawa jaise hawa

do larazte hath jaise saya phailae shajar
kanpte honton pe ek harf-e-dua jaise hawa

paniyon mein dubti jaise ruton ki kashtiyan
sahilon par chikhti koi sada jaise hawa

kitna khali hai ye daman jis tarah daman-e-dasht
kuchh na kuchh to de use mere khuda jaise hawa