koi yaqin kare kyon kisi gawahi pe
mujhe yaqin nahin jab apni be-gunahi pe

uthe na zill-e-ilahi pe ungli ab koi
ye harf haar ka aae kisi sipahi pe

nishan rahi ke rahon pe ho na ho lekin
nishan rahon ke aksar milenge rahi pe

ada ye sikh hi leta agar pata hota
saron ke dam to lagne hain kaj-kulahi pe

rahunga jashn-zada main bahane kya kam hain
tu raqs dekhna mera meri tabahi pe

ye zakhm riste hain mere qalam zariya hai
guman khun ka hona hi hai siyahi pe