krishn ko chahta hun aashiq-e-subhan hun main
sab mujhe kahte hain hindu wo musalman hun main

ram bhi krishn bhi ahmad bhi gurunanak bhi
dil se in chaaron buzurgon ka sana-khwan hun main

lab pe har-har hai mere dil mein hai allah allah
wed padh leta hun aur hafiz-e-quran hun main

mera mazhab hai yahi sab ko samajhna apna
sab se milta hua rahta hun wo insan hun main

chaar din jina hai mil-jul ke basar ho 'asghar'
ab to is jag mein koi roz ka mehman hun main