kuan bhi khod liya phir bhi dil pareshan hai ab is ilaqe se baadal bahut gurezan hai badan-darida zamin dur tak hai phaili hui hara sa ek shajar khud pe kitna nazan hai kahin se koi bhi khush-kun khabar nahin aai bura hai waqt abhi har khushi gurezan hai bayan-e-dard-o-alam ab koi kare kis se har ek shakhs kisi masale mein ghaltan hai dikha ke aadmi aur jaanwar ki taswiren ye puchha bachchi ne donon mein kaun haiwan hai safedi us pe zaban se na pher paega syahi dil ki teri aankh se numayan hai jahan mein phaile andheron ka hai ye dar kaisa dilon mein shama jab iman ki farozan hai koi khushi bhi kahan lagti hai khushi ki tarah ba-roz-e-id bhi ab kaun kitna nadan hai ho ahl-e-hosh ya dasht-e-junun ka bashinda kisi ka aaj salamat nahin gareban hai