kuchh aisa hai fareb-e-nargis-e-mastana barson se
ki sab bhule hue hain kaba-o-but-khana barson se

na ab mansur baqi hai na wo dar-o-rasan lekin
faza mein gunjta hai nara-e-mastana barson se

chaman ke naunihaal is khak mein phulen phalen kaise
yahan chhaya hua hai sabza-e-begana barson se

ye aankhen muddaton se khugar-e-barq-e-tajalli hain
nasheman bijliyon ka hai mera kashana barson se

tere qurban idhar bhi ek jhonka abr-e-rahmat ka
jabinon mein girah hai sajda-e-shukrana barson se

'suhail' ab kis ko sajda kijiye hairat ka aalam hai
jabin khud ban gai sang-e-dar-e-jaanana barson se