kuchh aise 'ishq ka wo karobar karta tha
jafaen naqd wafaen udhaar karta tha

kahan badan pe kabhi koi war karta tha
ajab shikari tha dil ka shikar karta tha

phir ek roz qaza mere pas se guzri
main zindagi ka bahut e'tibar karta tha

usi mein lazzat-e-hijr-o-visal sab kuchh tha
wo ek pal jo mujhe sogwar karta tha

samajh liya tha rafugar jise mohabbat ka
qaba-e-‘ishq wahi tar-tar karta tha

meri hi 'aql se leta tha mashware sab 'ishq
mera junun hi mujhe hoshiyar karta tha