kuchh aise log bhi duniya mein pae jate hain
jahan bhi jaen diye wo jalae jate hain

ye aazmaishen yun hi ata nahin hotin
jo log khas hon wo aazmae jate hain

hamein husain se paighambaron se nisbat hai
hum is liye bhi bahut dil dukhae jate hain

wo shakhs surat-e-khurshid jab nikalta hai
to rang-o-nur mein hum bhi nahae jate hain

use bhi pyar hai un se jo dil-shikasta hon
so us ki bazm mein hum bhi bulae jate hain

main apne dil se pareshan hun kidhar jaun
jo bewafa the use yaad aae jate hain

to kul mila ke mujhe baat ye samajh aai
jo nek log hon aksar satae jate hain

dua salam na hadd-e-adab na ijz-o-khulus
ye mere shahr mein ab kaun aae jate hain

ajib log hain shair bhi ye khuda jaane
koi sune na sune ye sunae jate hain

mera yaqin hai ye khamushi ye gahra sukut
ye log khud nahin aate ye lae jate hain