kuchh akeli nahin meri qismat
gham ko bhi sath laga lagai hai

muntazir der se the tum mere
ab jo tashrif saba lai hai

nighat-e-zulf ghubar-e-rah-e-dost
aakhir us kuche se kya lai hai

maut bhi ruth gai thi mujh se
ye shab-e-hijr mana lai hai

mujh ko le ja ke meri aankh wahan
ek tamasha sa dikha lai hai

aah ko su-e-asar bheja tha
wan se kya jaaniye kya lai hai

'shibli'-e-zar se kah de koi
muzhda-e-wasl saba lai hai