kuchh bhi ho ye to mere yar nahin ho sakta
main tera hashiya-bardar nahin ho sakta

dil se tum ja to rahe ho magar itna sun lo
ye daricha kabhi diwar nahin ho sakta

rasm-e-izhaar-e-mohabbat mein zaruri hi sahi
ye tamasha sar-e-bazar nahin ho sakta

wasl ki chah karun hijr mein bhi aah bharun
ye mere ishq ka mear nahin ho sakta

apni tarif suni hai to ye sach bhi sun le
tujh se achchha tera kirdar nahin ho sakta