kuchh der tak to mujh ko nihaara chala gaya
kal subh meri aankh ka tara chala gaya

wo khush hua ki us ko khasara nahin hua
main ro raha tha mera sahaara chala gaya

wo guftugu ke waste aaya tha baam par
main chup raha to uth ke sitara chala gaya

karna tha intikhab marasim mein ishq mein
main ne sira bachaya kinara chala gaya

wo puchhte hain kab khuda aaya hai farsh par
hum ne kaha ki tum ko utara chala gaya

hum ro rahe hain us ko jise koi gham nahin
us ko to kuchh nahin tha hamara chala gaya

'amrit' tumhein bhi duniya bari lagne lag gai
koi to is jahan se tumhaara chala gaya