kuchh haqiqat hai kuchh kahani hai
sirf kahne ko haq-bayani hai

ishq-e-fani rawan hua jab jab
hasraton par chadhi jawani hai

naw sahil pe aa ke dub gai
na-khudaon ki mehrbani hai

jo diye ot mein the wo hi bujhe
ye hawaon ki pasbani hai

zard patton ne muskura ke kaha
fasl-e-gul hai hawa suhani hai

sham ki chae un ke sath piyun
dil ki hasrat bahut purani hai

raushnai banai ashkon se
meri ghazlon mein ab rawani hai