kuchh nazar aata nahin hai wo ujala kar diya
sab hi apna aap bhule wo tamasha kar diya

kan bhi padti nahin hai ab to aawaz-e-zamir
khokhle zehnon ne itna shor barpa kar diya

hath khali hain hamare aur kuchh rabb-e-jalil
tu ne jo kuchh bhi likha tha hum ne pura kar diya

masale jaise chatanen rahnuma jaise hawa
waqt ne kitne falak-boson ko bauna kar diya

chunta phirta hun main apne-ap wahi raat din
zindagi ne yun bikhera reza reza kar diya