kuchh sae se har lahza kisi samt rawan hain
is shahr mein warna na makin hain na makan hain

hum khud se juda hauke tujhe dhundne nikle
bikhre hain ab aise ki yahan hain na wahan hain

jati hain tere ghar ko sabhi shahr ki rahen
lagta hai ki sab log teri samt rawan hain

ai mauja-e-awara kabhi hum se bhi takra
ek umr se hum bhi sar-e-sahil nigaran hain

simte the kabhi hum to samae sar-e-mizhgan
phaile hain ab aise ki karan ta-ba-karan hain

tu dhund hamein waqt ki diwar ke us par
hum dur bahut dur ki manzil ka nishan hain

ek din tere aanchal ki hawa ban ke ude the
us din se zamane ki nigahon pe garan hain

todo na hamare liye aawaz ka aahang
hum log to ek dubte lamhe ki fughan hain

wo jin se farozan hua ek aalam-e-imkan
wo chand-sifat log 'rashid' aaj kahan hain