kuchh to hasil ho gaya irfan-e-mai-khana mujhe
aaj paimane ko main takta hun paimana mujhe

dar par naghmon ka chha jaana koi aasan nahin
saz kya kam tha jo bakhsha soz-e-parwana mujhe

jod dale kitne saghar kitne mina kitne dil
ek zara jo mil gai thi khak-e-mai-khana mujhe

zindagi apni haqiqat hi haqiqat thi magar
aaj duniya ne bana dala hai afsana mujhe

rishta-e-derina-e-wahshat na tuta aaj tak
yaad virane ko main karta hun virana mujhe

subh-e-kaba sham-e-but-khana ki hai mujh ko talash
dhundhti hai subh-e-kaba sham-e-but-khana mujhe