kuchh tum se shikayat thi na duniya se gila tha
main yunhi zara der ko khamosh hua tha

wo umr-e-gurezan ho ki ho tera tasawwur
sae ki tarah sath mere koi laga tha

kya jaaniye kis waste maslub hua hun
duniya mein to bahuton ne tera nam liya tha

aa jate na gar samne dariya ke kinare
main hijr-e-musalsal ko tere bhul chala tha

wo waqt bhi guzra hai ki jiddat ke junun mein
main apni nawaon ka gala ghont raha tha

sab bhul chuka main to teri yaad ka aalam
ye yaad hai ek bulbula pani se utha tha

kya wo bhi 'saba' mujh ko na pahchan sakega
hairat se jo aaina mujhe dekh raha tha