kuchh us ko yaad karun us ka intizar karun
bahut sukut hai main khud ko be-qarar karun

bharun main rang nae muzmahil tamanna mein
udas raat ko aasuda-e-bahaar karun

kuchh aur chah badhaun kuchh aur dard sahun
jo mujh se dur hai yun us ko ham-kanar karun

wafa ke nam pe kya kya jafaen hoti rahin
main har libas-e-jafa aaj tar tar karun

wo meri rah mein kante bichhae main lekin
usi ko pyar karun us pe e'tibar karun

ye mere khwab meri zindagi ka sarmaya
na kyun ye khwab bhi main aaj nazr-e-yar karun