kuchh uzr pas-e-wada-khilafi nahin rakhte
ho kaise masiha dam-e-shafi nahin rakhte

aise to na the zakhm ki jo bhar hi na pate
ahbab magar zarf-e-talafi nahin rakhte

is chain se jine mein koi bhed nahin hai
bas ye ki tamannaen izafi nahin rakhte

is daur mein insaf panap hi nahin sakta
ikhlas-e-qalam jis mein sahafi nahin rakhte

hain aur bhi duniya mein sukhnawar bahut achchhe
hum jaisa magar zauq-e-qawafi nahin rakhte

ye moajiza mohtaj hai pindar-e-wafa ka
sab teshe dam-e-koh-shigafi nahin rakhte

har baat mein kam-maya nazar aate hain 'anjum'
rahat to kuja dard bhi kafi nahin rakhte