kufe ke qarib ho gaya hai
lahore ajib ho gaya hai

har dost hai mere khun ka pyasa
har dost raqib ho gaya hai

har aankh ki zulmaton se yari
har zehn muhib ho gaya hai

kya hansta hansata shahr yaro
hasid ka nasib ho gaya hai

phaila tha masih-e-waqt ban kar
simta to salib ho gaya hai

kaghaz pe ugal raha hai nafrat
kam-zarf adib ho gaya hai

is shahr ke dil nahin hai 'zulfi'
ye shahr gharib ho gaya hai