kya bataen khud ko kyon barbaad karte rah gae
umr bhar ek shakhs ki imdad karte rah gae

chand ghazlen likh ke un ko shohraten hasil huin
aur hum bas dard ka anuwad karte rah gae

raste bilkul ghalat phir bhi unhen manzil mili
hum sahi raston ko hi ijad karte rah gae

dekhiye mali ne phulon ko masal kar rakh diya
aur hum ek fakhta aazad karte rah gae

ek chehra jo meri aankhon mein ghar karta raha
bas usi chehre ko 'satya' yaad karte rah gae