kya chiz hai uzr-e-lab-e-izhaar ka saya
iqrar ka saya kabhi inkar ka saya

taqdir gulistan ki badal deta hai wo phul
pad jata hai jis phul pe talwar ka saya

diwar se diwar ki duri are tauba
padta nahin diwar pe diwar ka saya

ehsas ki ungli se tapakte hain sitare
chubhta hai mere zehn mein jab khar ka saya

'qaisar' mere jazbaat mein naghmon ki lachak hai
hai fan pe mere gesu-e-khamdar ka saya