kya dilkashi hai anjum-o-khurshid-o-mah mein
aise na jaane kitne hain is jalwa-gah mein

jannat khayal mein hai na duniya nigah mein
kya lazzaten mili hain gham-e-be-panah mein

dil ko rahe shuur jo haal-e-tabah mein
mearaj-e-zindagi hai gham-e-be-panah mein

kya jaane kya asar tha kisi ki nigah mein
sau husn aa gae mere haal-e-tabah mein

mujh se nigah pher ke kyon ja rahe ho tum
meri to zindagi hai tumhaari nigah mein

mear-e-bandagi-e-bashar hi badal diya
kuchh rind aa gae the kisi khanqah mein

rahmat ko bhi muawin-e-ghaflat bana diya
yun bhi koi na aae fareb-e-gunah mein

iman aur kufr ka jhagda hi kho diya
wo jab kabhi samae kisi ki nigah mein

teri nazar ki khair ho kitne hi aaine
tute hue pade hain mohabbat ki rah mein

hum donon mahw-e-shauq mein lekin maal-e-shauq
un ki nigah mein hai na meri nigah mein

aise adab se dekh rahe hain wo aaina
hazir ho jaise koi kisi bargah mein

paighambari raza-e-ilahi hai warna 'kaif'
yaqub dekh sakte the yusuf ko chah mein