kya hai gar be-sabaat hain hum log
hasil-e-kaenat hain hum log

sina-e-waqt mein dhadakte hain
taza-tar wardat hain hum log

hum se pata hai nur ru-e-sahar
waise kahne ko raat hain hum log

hum se kuchh bhi nahin hai na-mumkin
fateh-e-mumkinat hain hum log

zakhm khate hain muskuraate hain
khugar-e-hadsat hain hum log

pyas apni bujha nahi sakte
go ba-zahir furaat hain hum log

apni manzil nahin koi 'jauhar'
rah-guzar-e-hayat hain hum log