kya hui mujh se khata malum kar
kyon mili hai ye saza malum kar

ho raha hai zikr us ka har kahin
kya shagufa hai naya malum kar

sar-kashi ki hai hamein aadat bahut
tu hawaon ki disha malum kar

chaak dil hai kanpte lab aankh nam
maraz mere ki shifa malum kar

ruk gae be-sakhta mere qadam
ye achanak kya hua malum kar

nim-shab aawaz aati hai mujhe
kaun deta hai sada malum kar

chand hi mahrumiyon se thak gae
ek muflis ki dasha malum kar