kya kahun wo kidhar nahin rahta
han magar is nagar nahin rahta

tu ho tera khayal ho ya khwab
koi bhi raat bhar nahin rahta

jab sukun hi na de sake to phir
ghar kisi taur ghar nahin rahta

jis ghadi chaho tum chale aao
main koi chand par nahin rahta

yun to apni bhi justuju hai mujhe
tujh se bhi be-khabar nahin rahta

dil-figaron ke shahr mein 'tabish'
ek bhi bakhiya-gar nahin rahta