kya khabar thi ek din ye hadisa ho jaega
umr bhar chaha jise wo bewafa ho jaega

ho agar azm-e-musammam khwahish-e-manzil ke sath
rah ka patthar bhi ek din rahnuma ho jaega

is qadar badhne lagi hai har taraf aaludgi
sans lena aadmi ka masala ho jaega

zindagi bhar sath chalne ki jo khata hai qasam
dekhna wo raste hi mein juda ho jaega

ab tumhaara koi khat koi khabar milti nahin
aise aalam mein to jina bhi saza ho jaega

sar uthate hain yahan bhi asr-e-hazir ke yazid
kal ye khitta bhi mahaz-e-karbala ho jaega

kuchh na kuchh 'ejaz' naghme likh watan ke nam par
is tarah se shairi ka haq ada ho jaega