kya kisi lamha-e-rafta ne sataya hai tujhe
in dinon main ne pareshan sa paya hai tujhe

bahr-e-shadabi-e-jazbaat ki ai mauj-e-rawan
kaun is dasht-e-bala-khez mein laya hai tujhe

teri tanwir salamat magar ai mahr-e-mubin
ghar ki diwar pe yun kis ne sajaya hai tujhe

shikwa-e-talkhi-e-haalat baja hai lekin
is pe rota hun ki main ne bhi rulaya hai tujhe

gah pahna hai tujhe khilat-e-zarrin ki tarah
gah paiwand ke manind chhupaya hai tujhe

tu kabhi mujh se rahi misl-e-saba daman-kash
aur kabhi apne hi bistar pe sulaya hai tujhe

meri aashufta-mizaji mein nahin koi kalam
ruth ke sare zamane se manaya hai tujhe