kya koi yaad tere dil ko dukhati hai hawa
sard sannate mein kyun shor machati hai hawa

ye khabar di hai parindon ne chalo sunte hain
jhil ke pas koi git sunati hai hawa

bagh murjhae chaman roya hue dasht udas
sab ko mayus kahan chhod ke jati hai hawa

khushbuon aao thahar jao hamare aangan
phir ishaaron mein bahaaron ko bulati hai hawa

jo gaya laut ke aaya hi nahin sarhad se
ab kise dasht mein aawaz lagati hai hawa

jhund mein lautne lagte hain sunahre panchhi
sukhti shakhon pe jab phul khilati hai hawa

khair-maqdam ke liye band dariche kholo
naz-o-andaz se kis shan se aati hai hawa