kya kya hui hai baat ki tahqir dekhiye
chup-chap kahne wale ki taswir dekhiye

guzri tamam umr to tamir-e-khwab mein
fursat kahan ki khwab ki tabir dekhiye

sidq-e-maqal shoala-e-uryan bana gaya
taqdir mein tapish hai ki tanwir dekhiye

kya daur hai ki lafz se mani nikal gae
khali makan ki shaukat-e-tamir dekhiye

jaur-o-karam ka farq hi zehnon se mit gaya
kya kya hui jafaon ki tafsir dekhiye