tu agar be-naqab ho jata
to har ek faizyab ho jata

tare sab mahtab ho jate
mahtab aaftab ho jata

likhte diwan mein jo wasf-e-rukh
har waraq aaftab ho jata

tu batata jo rah-e-mai-khana
shaikh kar-e-sawab ho jata

imtihan lete hain wo maqtal mein
pahle main intikhab ho jata

thi hawa-e-khudi bhari is mein
kyun na be-khud habab ho jata

jag uthte nasib aashiq ke
yar agar mast-e-khwab ho jata

chain se sote farsh-e-rahat par
jo khayal un ka khwab ho jata

shab-e-wada agar na aate aap
khwab bhi mujh ko khwab

kash ai dard-e-ishq tere liye
dil mera intikhab ho jata

yarab us but ko shokhiyan aatin
dur us se hijab ho jata

chaal chalte jo tum qayamat ki
fitna hi ham-rikab ho jata

apna nakhun tarashta wo khud
mah-e-nau ka jawab ho jata

jang hoti adu se ai 'sabir'
aur main fath-yab ho jata