kya kya sadaen sunte hain khali makan se hum
behtar to ye hai bhag chalen ab yahan se hum

sarsabz wadiyon ki tarah mahw-e-khwab wo
aur dhup mein jhulaste hue saeban se hum

wo dur aasman pe chadhti patang ki
ek dor the ki tut gae darmiyan se hum

ruhon ka ghol tha ki khada chikhta raha
bahar nikal ke ja na sake jism-o-jaan se hum

khwahish ki aag thi ki jalati rahi hamein
tahlil ho gae hain faza mein dhuan se hum