kya la-makan se aage zamin aasman hain aur
kya kuchh makin bhi aur hain kya kuchh makan hain aur

sahil nahin mila magar itna pata chala
is bahr mein jazire kai be-nishan hain aur

jhukti hain jin ke aage mukhalif hawaen bhi
wo kashtiyan hi aur hain wo baadban hain aur

sahra jo mauj-e-reg hua kuchh bhi gham nahin
dariya mein bhi tumhaare qadam ke nishan hain aur

un se mukalima tha muqaddar tamam-umr
apni zaban aur wo ahl-e-zaban hain aur

betab kaamyab hue hum hazar bar
har bar ye suna ki abhi imtihan hain aur