kya nam-e-khuda apni bhi ruswai hai kam-bakht
ruswai-e-majnun bhi tamashai hai kam-bakht

ladne ko lade us se par ab karte hain afsos
afsos ajab apni bhi danai hai kam-bakht

ek baat bhi mil kar na karen us se hum ai charkh
kya tujh ko yahi baat pasand aai hai kam-bakht

hamdam to yahi kahte hain chal bazm mein us ki
kya kahiye use apni jo khud-rai hai kam-bakht

wo to nahin waqif pa hamin dil mein khajil hain
kis munh se kahen hum ne qasam khai hai kam-bakht

yaro hamein taklif na do sair-e-chaman ki
aane do bala se jo bahaar aai hai kam-bakht

rahne do hamein kunj-e-qafas mein ki hamare
qismat mein yahi gosha-e-tanhai hai kam-bakht

is jam-e-nigun se mai-e-rahat na talab kar
yan baada nahin baadiya-paimai hai kam-bakht

tode hain bahut shisha-e-dil jis ne 'nazir' aah
phir charkh wahi gumbad-e-minai hai kam-bakht